Shkencëtarët kanë zbuluar një lloj druri krejtësisht të ri (Përktheu Ismail Ismaili)
Moderator 
SHKENCËTARËT KANË ZBULUAR NJË LLOJ DRURI KREJTËSISHT TË RI
Nga Brice Louvet, ekspert i hapësirës dhe shkencës
Kredite: Guasor/istok
Zbulimi i fundit i një lloji të ri druri nga shkencëtarët po ndryshon të kuptuarit tonë për klasifikimet tradicionale botanike. I quajtur dru i ndërmjetëm, ai vjen nga dy lloje pemësh: pema e tulipanit Virginia dhe pema e tulipanit kinez, e gjinisë Liriodendron. Ky zbulim nxjerr në pah kompleksitetin e strukturës qelizore të drurit dhe sugjeron implikime potencialisht të rëndësishme për luftimin e ndryshimeve klimatike përmes vetive unike të sekuestrimit të karbonit.
Një strukturë unike qelizore
Tradicionalisht, pemët klasifikohen në dy kategori të gjera: angiosperma , të quajtura në gjuhën e folur drurë të fortë dhe gjimnosperma , të njohura si drurë të butë. Këto klasifikime nuk bazohen në densitetin e drurit, por më tepër në mënyrën se si pemët i shpërndajnë farat e tyre . Drurët e fortë, si lisi dhe panja, i shpërndajnë farat e tyre të mbyllura në fruta ose guaska, ndërsa drurët e butë, si halorët, i lënë farat e tyre të ekspozuara.
Në një nivel mikroskopik, drurët e fortë dhe drurët e butë ndryshojnë gjithashtu në strukturën e mureve të tyre qelizore. Drurët e fortë kanë makrofibrile më të ngushta, rreth pesëmbëdhjetë nanometra në diametër , të cilat kontribuojnë në ngurtësinë dhe forcën e drurit. Në të kundërt, makrofibrilet e drurit të butë kanë një diametër afërsisht njëzet e pesë nanometra.
Megjithatë, duke studiuar këto struktura mikroskopike, studiuesit zbuluan se druri i Virxhinias dhe i tulipanëve kinezë ka makrofibrile që kanë një diametër afërsisht njëzet nanometra , bien kështu midis matjeve tipike të drurëve të fortë dhe drurëve të butë. Kjo strukturë makrofibrilare e ndërmjetme i dallon këto dy specie nga pemët e tjera dhe mund të shpjegojë disa nga karakteristikat e tyre unike.
Madhësia e strukturave të vogla të qelizave të pemëve të tulipanëve nuk i bën ato drurë ose drurë të butë.
Kredite: Jan J Lyczakowski dhe Raymond Wightman
Potenciali për sekuestrimin e karbonit
Analiza qelizore zbuloi se këto pemë evoluan 30 deri në 50 milionë vjet më parë, një kohë kur përqendrimi i CO2 në atmosferë ra me shpejtësi. Pemët e tulipanëve kanë zhvilluar kështu një kapacitet të jashtëzakonshëm për të kapur dhe ruajtur karbonin në mënyrë që të përshtaten me këto kushte të veçanta , gjë që e bën drurin e ndërmjetëm një burim potencialisht të vlefshëm në luftën kundër ndryshimeve klimatike .
Zbulimi është edhe më interesant pasi Virxhinia dhe tulipanët kinezë janë në gjendje të rriten shpejt. Prandaj, shkencëtarët besojnë se integrimi i këtyre pemëve në programet e kapjes së karbonit mund të jetë veçanërisht i dobishëm në kontekstin aktual të krizës klimatike. Për më tepër, vetitë unike të drurit të ndërmjetëm mund të frymëzojnë qasje të reja për menaxhimin e pyjeve dhe zhvillimin e qëndrueshëm.
Përktheu Ismail Ismaili
