Fatmir Gjata - Kënga e peshkatarit (poezi)
Moderator 
KËNGA E PESHKATARIT
Shko varka ime nëpër lumë,
hej hej kur bie shi
Është vonë edhe po më vjen gjumë,
dhe nuk më pret njeri.
Shko varka ime në kënetë,
hai hai do mbesim jashtë
Një pulëbardhë s'di se ç'më flet,
krahënderur përmbi kashtë.
Shko varka ime nëpër rrjedhë,
hou hou vorbull e gjorë
Kur hënë ca yj nga pas t'i mbledhë,
e të mi jap në dorë.
Shko varka ime, varkë e brishtë,
aiii ai me një lopatë
Po shkon dhe sot mbrëmja e trishtë,
pas pak do bëhet natë.
Shko varka ime nëpër det,
hou hou drejt mbi shkëmbinj
Ndoshta sirenë mbetet në rrjetë,
sirenë me sy të zinj.
Shko varka ime ku të shpjerë,
hej hej një rrymë e nxirë
S'kam kohë për dashuri, i mjerë,
do fle në errësirë.
