Dafina Roka - CIKËL POETIK

(Nga vëllimi poetik “Fjalë zemre”)

TI U RRITE BIRI IM

Vitet ikën e ti u rrite

zemra e mallit tim!

Por, kjo është vërtet një çudi!

Përse syri im të shikon çdo herë si fëmijë?

Të ndjek me vrap me njëqind porosi

Më përgjigjesh: e di të njëjtat i thua ti!

Ti nuk e di biri im që bota sillet rreth stuhive

që duan të të përpijnë.

Botën engjëllore ruaje se të ka nëna shpirt!

Mos shkel njeri as mos e qesh askënd për ves.

Fal dashuri dhe mirësi

në rrugët që vetëm jeta di të të përcjellë!

Mos e kthe kurrë dorën që të afrohet për ndihmë

tek ti shikon mirësinë,

lumturoje, për hir të nënës

që të dhuroi një jetë me sakrificë.

MREKULLI

Flluska të kristalta

lajmërojnë jetë

në thellësinë e detit

një turmë brohoret

vallëzon një sirenë

juria mban fenerë

trup qëndisur

kurorë me margaritarë

shpërblim për vals

mrekullia në thellësi

dritë në pafundësi

deti duket si qiell

reflektim yjesh

në detin e qetë.

Përpëlitet valë e qetë

marinari magjepset

hipnotizim sirenash

deti kërkon jetë!

LARGOJE MASKËN

Ndjej urrejtje

po, mos u befaso

të gjithë bartin maska

Nuk e njoh më askënd

lodhja më bën shoqëri

mike e zemrës

i zhgënjyer

shpirti im.

Urrejtjen nuk e njoha

e mësova nga ju.

Ndjej urrejtje,

trishtim

mos u befaso

largoje maskën,

shiko veten në pasqyrë,

mos u tremb

as mos u trishto

as mos u befaso

kur ajo të pështyn

në fytyrën tënde

të fshehur në dinakëri

ajo nuk gënjen

të shfaq ashtu siç je.

Jeton për të tashmen

në botën e dhuruar si bekim

e shndërruat në zhgënjim,

trishtim.

Botë e interesit

mbete për përfitim

fundin e ke

nga maskat

në fytyrat e dinakërisë.

SHPRESË

Shkumë e kthjellët

Valëvitet ndër valët e detit.

Dallgët e magjishme

Sjellin margaritarin e ruajtur

Në guacën e shpresës.

Sjell fat menduan disa

Lumturia vrapoi

Mendoi të triumfojë.

U lodh dhe etja e mundoi

Dorën e zgjati

Margaritar rrëshqitur në baltë.

E harroi vlerën

Thellësia e mashtroi

Pika e ujit e shpëtoi.

Një falënderim

Kthimi është i bukur

Në thellësinë e detit të magjishëm

Fat në shpresën e humbur.