Valbona Kolaveri - Cikël poetik
Moderator 
TYMOS MENDIME
Flegra flegra
Shprishet shpirti
Ndër ndejë
Të pandejë
Kurrizdalë dita,
Shkapërcen ndër fjalë
Dhe veten
Në shpengime të çala
Tymos
Mendime të pazëshme,
Tek ndizem përbrenda
Veten të gjej
Duke lutur
Qetësinë hijeve
Kur mund të jem e lumtur?
FUNEBËR
Nëse më sundon
Pushteti yt,
Atëherë,
Pa drojë
Edhe më prangos
Qelizë e vdekur
Do të jem,
Pa ujë,
Pa dritë,
Pa rrënjë,
Rrangallë
Që më nëpërkëmbë
Nëse unë
Jam robi yt,
Atëherë,
Ti vendos,
Po po vetëm ti
Deri atëherë
Do kem vdekur,
Duke të të ndjekur
Sy qorrazi
Zvarrë,
I drobitur,
I ngrat,
I paudhë,
I pagojë,
I pa frymë,
Hu,
I pagdhendur dru
Nëse më marros,
Duke të dëgjuar ty,
I shurdhuar jam
Nxirrmi dhe dy sytë,
Verbërinë më ndill
Se I pandreqshëm
Budalla,
Që kurrë s’mësoi,
I fikur do t’lëngoj
Funebër varresh
Pa mbarim
Do të jem
Ftohtësi në gur
