Rekuiem për piktorin lezhian Mikel Paluca
Moderator 
Rekuiem për piktorin lezhian Mikel Paluca
ARTISTËT NUK VDESIN
Mikel Paluca ishte një piktor i shquar shqiptar, autor i qindra pikturave realiste të famshme jo vetëm në Shqipëri por në mbarë botën. Ishte artist e mjeshtër i brushës, krijues i artit e veprimtar i devotshëm. Mikeli ishte nga Lezha, kurse prej kohësh jetonte dhe punonte në Itali.
E njohëm atëherë kur Kosovës ende i vinte era shkrumb e hi, gjithandej kishte rrënoja, lot nënash e vuajtje nga lufta. Mikeli së bashku me kolegun e tij Gjovalin Dushaj erdhën në Kosovë për ta ndarë dhimbjen bashkë me popullin vëlla. Ata u bënë prishtinas, klinas, u bënë kosovar. Fillimisht u vendosen në lokalet e Trupës Artistike Ushtarake “Hamëz Jashari” në Prishtinë, ku dhe filluan veprimtarinë e tyre prej artistësh.
Mikel Paluca, gjatë rrugëtimit të tij artistik përvetësoj mjaftueshëm teknikat e punës në telajo e materiale tjera, përvetësoj figurën e njeriut përmes portretit, natyrën e qetë tradicionale të përpunuar, peizazhin e imagjinuar romantik, sidomos atë të temave historike.
Ai kishte talent dhe ide për dizajnin e logove të institucioneve e kompanive të ndryshme. Ideuan dhe dizajnuan logon e SHP të TMK-së, logon e TAU “Hamëz Jashari”, Qendra e kulturës “Jehona e Dukagjinit” Klinë, si dhe dhjetëra logo e simbole tjera. Mikeli në vitin 2005 hapi Ekspozitën e pavarur në Galerinë e Qendrës së Kulturës “Jehona e Dukagjinit” në Klinë, ku e vizituan mijëra artdashës e qytetar të Klinës me rrethinë.
Mikel Paluca ishte shpirt artisti, shok e mik i mirë, gazmor e i hareshëm në shoqëri. Ai gjatë gjithë jetës së i qëndroi besnik artit dhe brushës së tij, i cili la pas vepra të shumta në pikturë, si produkte shpirtërore, prandaj edhe thuhet e shkruhet se Artistët nuk vdesin.
Prishtinë – Klinë
Akademik Piktor Idriz Berisha
Dibran Fylli, regjisor/aktor
