Angela Kosta – Biografia dhe krijimtaria e piktorit Bashkim Alushi

Maj 10, 2024 - 08:40 Përditësuar: Maj 10, 2024 - 09:16

Angela Kosta – Biografia dhe krijimtaria e piktorit Bashkim Alushi

PIKTORI BASHKIM ALUSHI MIDIS NGJYRAVE TË ARTIT MODERN

Bashkim Alushi ka lindur në Mallakastër më 25 shtator të vitit 1954. Bashkimi ka kryer shkollën e mesme ushtarake “Skënderbej” si dhe Akademinë Ushtarake për topografi në Tiranë. Ka bërë gjithashtu disa kualifikime dhe specializime në fushën e hartografisë duke shërbyer në institucione të rëndësishme ushtarake me gradën major. Pas reformave të kryera në ushtri e ushtroi profesionin e tij në institucionet civile të shtetit. Gjatë gjithë jetës së tij, që nga fëmijëria, Bashkimi ka shprehur talentin në vizatim duke marrë mësime sporadike nga disa mjeshtër të shquar të kohës si: Fatmir Haxhiu, S. Shijaku, V. Kilica e shumë artistë të tjerë të cilët së bashku me shokun dhe kolegun Fejzo Lala i kishin gjithmonë dyert e studiove të tyre të hapura, duke parë dhe vlerësuar tek ata talentin dhe pasionin për pikturën. Formimi dhe cilësia artistike doli në pah që në vitet e rinisë duke u bërë pjesë e shtypit dhe ekspozitave të kohës në gjininë e grafikës me shumë botime në revista të artit dhe gazeta.

Në vitet studentore, së bashku me shokun e tij të shkollës Fejzo Lala, hapën ekspozitën e parë në Pallatin e Kulturës në Tiranë ku u vlerësua talenti në punimet e ekspozuara, duke shërbyer si njohje dhe vlerësim në pjesëmarrjen në ekspozita të ndryshme të organizuara nga galeria kombëtare e arteve, duke i trajtuar të dy artistët si profesionist përmes akordimit të lejeve krijuese dhe studiove të punës. Edhe gjatë viteve të demokracisë, me shumë pasion, Bashkimi i ka ushtruar të dy profesionet: në fushën e artit me shumë ekspozita personale dhe me bashkautorë brenda dhe jashtë vendit.

Në vitin 1996 ai ekspozoi me dy bashkautorë të shquar në “Galiko Instituto” Greqi duke mos u ndarë edhe nga ekspozitat që Galeria e Arteve në Fier dhe Tiranë organizonte. Gjithashtu, së bashku me artistin italian Sergio Marini Graseti, Bashkimi hapi ekspozitën në panairin euriopian “Fiera della Pesca - Panairi i Peshkimit” me të njejtën tematikë në të cilin punoi live në portin e peshkimit Ancona. Më pas, në sallën e tavernellave, me rastin e Festës së Gruas, hapi ekspozitën personale me portrete të grave të shquara nga Unioni i Grave “ Qytetare të Botës”. Bashkim Aliu ka qenë pjesëmarrës në ekspozita të ndryshme brenda dhe jashtë vendit me Shoqatën e Artistëve pa kufij në: Zvicër, Belgjikë, etj... Bashkimi ka qenë pjesëmarrës edhe në ekspozitën e përvitshme “Pranvera” ashtu sikurse edhe në shumë aktivitete të tjera. Ai vazhdon të krijojë në gjininë e kompozimit, peizazhit, portretit dhe grafikës dhe së shpejti do të paraqitet me ekspozitë vetjake.