Rrustem Hyseni - TE KROI I LOTËVE
Moderator 
TE KROI I LOTËVE
(Kushtuar Kroit të lotëve në Gorozhup të Hasit)
Te kroi i lotëve
Pinim ujë të përlotur
Porositë e fshehura
Në këngë shndërruar
Te gurra e dhembjeve
Fjalë të robëruara
Në heshtje varrosur
Zogjtë të frikësuar
Ulët fluturonin
Qiellit të mjegulluar
Nuk i besonin dot
Nga pështyma e djajve
I ruanim sytë
Pas perdes së zezë
Mos të treten peizazhet
E bukura
Në çdo pranverë
Vetëm shpresa lulëzonte
Te kroi i lotëve
Në shpirt pikturonim
Etjen e pashuar
Të përqafimeve
Hasi i lashtë
Nën hije të kohës
Thurë balada të thime
Kujtime zhvarrosë
Te kroi i lotëve
Sa herë na e zbulonin
Kodin e domethënieve
Ktheheshim në pantomimë
Andej e këndej bregut
Shpesh bënim dasmë pa nuse
Hapnim të pame
Pa ceremoni varrimi
Të përlotur
Të përmalluar
Pas çdo ndarjeje
Thahej një pemë
Pas një shiu të gjatë
Muret e kalbura u rrënuan
Gjarpinjtë e shtëpisë
Dolën nga themeli
Bashkë me korbin
Qiellin synuan
Njeri tjetrit gjakun ia pinë
Në gotë mashtrimi.
E vëllezër s'u bënë kurrë
Në ADN e kohës
Mbetën pa gjurmë
Për të verbër
Merimanga thurë
Rrjetë mashtrimi
Si tek kroi i lotëve dikur
