Rifat Ismaili - Cikël poetik
Moderator 
RIFAT ISMAILI
Rifat Ismaili (lindur më 24 mars 1968, Durrës) është poet, prozator, eseist, përkthyes dhe redaktor shqiptar. Që prej vitit 1991 jeton në Itali, ku ka vazhduar krijimtarinë e tij letrare dhe botimet ndërkombëtare. Autor i mbi 40 librave në gjini të ndryshme : poezi, tregime, romane, ese dhe letërsi për fëmijë , ai është botuar gjithashtu në italisht, anglisht, spanjisht, arabisht, turqisht, kineze dhe gjuhë të tjera. Ai drejton revistat letrare ''Gjurmë Penash'' dhe ''Kryefjala'', si dhe revistën për fëmijë ''Pena Balerina''. Shkrimet e tij trajtojnë tema të dashurisë, lirisë, identitetit dhe imagjinatës, duke kapur lexues të çdo moshe.
Çmime letrare kombëtare dhe ndërkombëtare vlerësojnë krijimtarinë e tij poetike dhe prozës, ndërsa veprat e tij vazhdojnë të jenë pjesë e antologjive dhe revistave në Shqipëri, Kosovë, Itali dhe vende të tjera.
CIKËL POETIK: HARROVA TË PUTH TRËNDAFILIN
NJË DITË E RE
Dielli ndrit
më vesh
kostumin e dhëndrit.
Si një varkë letre
një harabel
në krah m'u ngjit.
Me veten shahem orë e çast.
Harrova
të puth trëndafilin.
MESDITË
Në mesditë bredh nëpër rrugën e vetmuar
Pemët, rrugët, janë në gjumë.
Në kujtesën time ditën ma prish
Një lodhje e shpërndarë si frizurë.
Harabelat të kthyer sërish
Hereoglife malli lënë në pluhur...
KAPELA E ARTË
Diell, diell i vendlindjes,
kapelë e artë ndër flokë e ndër sy...
Për ty, e dashur, si lulëkuq
do e hedh në arë,
dhe ara dhe lulet do marrin zjarr...
QYTETI KUR ZGJOHET
E dua qytetin tim
Në mëngjez
Kur në rrugë
Nuk kalon asnjë njeri.
Shpërndaj me dorë
Tymin e çative
Dhe me mjegullën qytetin
Mbuloj porsi fëmijë.
Që kur të zgjohet
Si një grua
Të zbulohet
Vetëm për mua...
BUZË DETIT
Buzë rërës së pafundme,
në gjurmët e këmbëve të ikura
u shtriva që të fle.
I shtrirë udhëtoj tani
nëpër ëndrra të largëta...
Në horizont dielli ndrit si peshk!
KUR NGRIJA BALONA
Penjtë donin të më tërhiqnin lart
Me mua sikur donte të ngjitej
Te këmbët e mia çdo fije bar...
