Izet Abdyli - Cikël poetik-satirik
Moderator 
Cikël poetik-satirik
KUJDES NGA SERVILI
Kujdes nga servilI
Që ta rrah shpinen
Se njëqind të zeza
Pastaj t'i bën tinëz
Kujdes nga servili
Që të lëvdon ndër sy
Se ta bënë llagëmin
Një metër me dy
Kujdes nga servili
Që shtron dreka e darka
Mos e harro kurrë
Që dardha ka bishtin mbrapa
Kujdes nga servili
Që përbehet në ty
Se kur t'i vjen rasti
Duart ti vën në dry
17 gusht 2021
Vendlindje
BOTĒ E RREJSHME
Kjo botë e rrejshme
Është veç mashtrim
Ata që hajnë dardhën
Harrojnë se ka bisht
Ata që nuk ia dijnë
Fundin e pasurisë
Harrojnë se në dy metra
N'fund kanë m'u mbërthy
Ata që me shpifje
Ndërtojnë karrieren
Do të vij një ditē
Të mos e njohin vetën
Sekush do të kujtohet
Kur t'ë ikë nga kjo botë
Qoftë për vepra të mira
Qoftë pse u ba horë
11.09.2021
Vendlindje
FJALËT E PLEQVE
Fjalët e pleqve
Sot po vërtetohen
,,Dikujt ja jep gishtin
e ta merr krejt dorën”
Edhe po pate pasuri
Kujdes kujt i shtrinë dorën
,,Po i shtrove sofrën gjithkujt
Të vret buka jote”
Edhe një fjalë tjetër
Është përdorur shpesh
,, Po i bërë mirë dikujt
do ta kthen me të keq”
Për mikun e shokun
Që betohen shpesh
,, për t’i njohur mirë
Jepu pak pushtet”
E për dredharakun
Që flet me siklet
,, kurrë mos e pyet
se të kallëzon vetë ”
Prandaj për do tipa
Që fshehën kudo
,, Katundi që shihet
kallauz nuk donë ”
Prishtinë, 13.10.2021
OPEN BALLKAN
Open Ballkan
Është ide e vjetër
Ëndërr e Sërbisë
Për të dalë në dete
Në shekullin njëzetë
Kishte erë komuniste
Ta bëjë Shqipërinë të shtatën
Republikë Socialiste
E tash prapë janë ringjallur
Ujqërit e vjetër
Me Open Ballkan
Duan dalje në dete
Kjo pra është Serbia
Ajo skile e vjetër
Që ëndrrat i shprush
Pas çdo 50 vjete
Në tren Drenas-Prishtinë
28 shtator 2021
NGA FSHATI NË QYTET
Seç na erdh kjo kohë
Fshatrat mbetën shkretë
I madh e i vogël
Turr po bajnë n' qytet
Në hall kanë ra bagëtia
Në fshat kanë mbetur vetë
Po thonë që barinjtë
Kanë ikur n' parlament
Tokat kanë mbet shkretë
Djerrina pa kry
Po thonë shumë nga bujqit
Kanë ikur në qeveri
Bile edhe dembelat
Që silleshin vërdall
I paskan zanë vendet
Në administratë
24-25 Nëntor 2021
FJALORI I PARLAMENTIT
Nuk kanë nevojë studiuesit
Të hulumtojnë në teren
Leksikun për fjalor
E gjejnë në parlament
Në daç fjalë të urta
Në daç fjalë të pista
Në daç fjalë me kungja
Në daç fjalë me bishta
Herë me dialekt
Herë me gjuhë letrare
Trajtat edhe vetat
Seç i ngatërrojnë fare
Kur nxehet debati
E humbin busullën
Nga gurmazi tyre
Dalin veç fjalë rruge
Madje edhe shteteve
U vënë emra të rinj
Në vend të Amerikës
I thonë Amelikë
Kaq të mençur i kemi
Disa deputetet tonë
Veç me fjalë të tyre
Krijohet një fjalor
5 janar 2022
HANKO HALLA NGA KOHA E VJETËR
Ka zbrit Hanko Halla
Nga koha e vjetër
Të shoh çfarë po ndodhë
Në botēn moderne
Paska ndryshue bota tha
Paskan ndërrue adetet
Paskan fillue burrat
Të martohen mes vete
Po pyet Hanko Halla
Si u bë kjo punë
Cilit me i thanë grue
E cilit me i thanë burrë
Cilit mi thanë dhandërr
Cilit mi thanë nuse
Pasha hallen mirë
Nuk i tham kësaj pune
Ma mirë po kthehem
Prapë të koha e vjetër
Shumë ma mirë atje
I kemi rue adetet
FARA E PËRÇARJES
Debate pafund
Që si han pazari
Per merita e lavde
Kush ishte i pari
Kush ishte i pari
Qē e ndezi luftën
E kush ishte i tjetri
Që u fsheh pas lluge
Na janë mbushë TV-të
Plotë me (b)analista
Herë flasin për lisa
Herë flasin për fshisa
E shqyejnë gurmazin
E zjarr merr debati
Flasin përnjëherë
Si në mes të pazarit
Ndahen në dy taborre
E ia fusin kot
Kush ishte UDB-ash
E kush ishte patriot
Farën e përçarjes
Që po e mbjellin sot
Do të kalojnë dekada
E nuk do ta heqim dot
Në tren, Drenas-Prishtinë
15 qershor 2022
