Poezi nga Panajot Boli
Moderator 
IKU EDHE GUSHTI, MOJ MIKE
-sipas motiveve popullore-
Për aromën e ftoit, sa shumë më mori malli
Si fëmijë i paduruar afrohem,e shoh në sy
Ma ndal dorën e më flet si një zonjë e rendë
-Prit mik, t’i zverdhoj edhe pak gjinjtë e mi
Për lengun e kuq të shegës më mori një etje
Si fëmijë kokrrat dua t’i mbledh në një kapak
Ma ndal dorën e më flet topolakja me ushta
-Prit t’i skuq edhe ca, t’i ëmbëlsoj edhe pak
S’duroj dhe rrushin e shtrydh fort në dorë
E rrufis të dehem me këtë të bëkuarin musht
Më plase mike. Nuk e shikon? Erdhi vjeshta
Më zhuriti shpirtin ky behar, më gjithë gusht
Mos vallë pret të të hedh aromë i bukuri ftoi
E shega të kuqëloj më ëmbëlsi ato buzët e tu?
Të pi e të dehem dhe unë me mushtin e rrushit
Dhe pastaj krejt i zalisur të bie në krahët e tu?
SOT, NJË VOGËLUSH...
Sot,
Vogëlushit i buzëqeshi,
Një diell me dyer e dritare
Ai u lumturua me të
E si fluturë vrapoi drejt tij
E dorën e nënës harroi
Në krah,
Çanta me endrra ngarkuar
Me një karafil të kuq varur
Zogj çamarrok i ulen në sup
Këngë pranvere i thonë në vesh
E ai luante me to
Derën,
Piter Pani ia hapi duke qeshur
Dhe i shaloi një kalë të bukur, të bukur
Një dorë engjellore i mori dorën
Ta ndihmoj të ngjis shkallët e diellit
Me Piter Panin që s’i ndahej
KA KOHË QË...
Ka net që ca re tinzare
Ma burgosen hënën
E unë i gujuar pranë dritarës
Rri i pagjumë
Më lutet edhe Bistrica ime
Ku është ajo?
E kisha përnatë tek lahej e flertonte
Me të mirin tim, lumë.
Ka kohë që humbe edhe ti
Nuk e di ku dhe pse
Buzëqeshjen ta pashë në mjegullnajë
Tek ikte si hije..
Unë dhe lumi ju presim zgjuar
Këtu në breg
Të çmendet edhe nata,
Me një vals dashurie
Hëna,
Le të na lë pak vetem,
Të lahet si gorgonë në lumë
Të peshperis unë me puthje
-Shiko sa bukur,
Hëna në krahët e lumit
E lumturon aq shumë.
