Stafi i Revistës ORFEU dhe faqes orfeu.al
Moderator 
LETËR NGUSHËLLIMI NGA STAFI I REVISTËS: ORFEU
-Me dhimbje të thellë dhe trishtim të madh morëm lajmin për ndarjen e parakohshme nga jeta, në moshën 29-vjeçare të mikut tonë Jahongir Nomozov, promovues, poet, gazetar dhe botues nga Azerbaixhani.
-Veçanërisht, ai u shqua për përkushtimin e tij në promovimin e autorëve të rinj, në mbështetjen e zërave të pavarur dhe në krijimin e urave mes kulturave të ndryshme. Përmes aktiviteteve, botimeve dhe nismave kulturore, ai kontribuoi në ndërtimin e një hapësire ku arti dhe fjala e lirë gjetën vend për t'u përhapur dhe lulëzuar. Promovimet, intervistat që ai organizonte nuk ishin thjesht prezantime formale, por shndërroheshin në takime virtuale të gjalla kulturore, ku krijues, lexues dhe mendimtarë ndanin ide, përvoja dhe vizione për të ardhmen.
-Në thelb të punës së tij qëndronte besimi tek dialogu, një dialog i hapur, i sinqertë dhe gjithëpërfshirës. Ai i konsideronte këto hapësira si të domosdoshme për zhvillimin e shoqërisë, duke i kthyer dialogjet kulturore në platforma diskutimi ku trajtoheshin çështje të rëndësishme artistike, shoqërore dhe njerëzore. Në këtë mënyrë, Jahongir Nomozov nuk ishte vetëm një promovues i kulturës, por edhe një nxitës i mendimit kritik dhe i ndërveprimit mes njerëzve.
-Si poet dhe gazetar, ai e mishëronte fjalën me ndjeshmëri dhe përgjegjësi, duke sjellë një zë të ri dhe autentik në hapësirën publike. Ndërsa si botues, ai i dha mundësi shumë talenteve ndërkombëtarë të dëgjoheshin edhe në Azerbaixhan e kudo, duke i hapur rrugë gjithashtu edhe një brezi të ri krijuesish.
-Edhe pse jeta e tij u ndërpre tragjikisht kaq herët, gjurmët që ai la pas do të lënë filiza e rrënjë të thella e të rezistueshme. Kontributi i tij në promovimin e kulturës, në ndërtimin e dialogut dhe në mbështetjen e krijimtarisë do të mbetet një trashëgimi e vyer për shumë vite.
-Në këto momente zie të vështira, stafi i revistës sonë ORFEU, në të cilën Jahongir Nomozov bashkëpunonte, i shpreh ngushëllimet e sinqerta familjes, miqve, bashkëpunëtorëve dhe gjithë atyre që patën fatin ta njohin dhe të punojnë nga afër me të. Kujtimi i tij do të jetojë përmes veprës dhe ndikimit që ai pati në jetën tonë shoqërore. U prehtë në paqe e qoftë i përjetshëm kujtimi i tij!
Nga stafi: Angela Kosta, Redaktore përgjegjëse, Kryeredaktor Dibran Fylli; Redaksia: - Bedri Tahiri, Irma Kurti, Idriz Berisha, Ismail Ismaili, Abdullah Troshupa, Ahmet Pllana, Suela Boçi, Gjergj Rrustaj-Austri Jahja Lluka, Rajmonda Maleçka.
