Theo Pezzi (Shqipëroi Irma Kurti)
Moderator 
THEO PEZZI ka lindur në Ravenna dhe jeton në Cesena. Ai shkruan poezi e tregime në italisht dhe në dialektin Romanjol. Ka shkruar vepra të shumta dhe është pjesëmarrës në konkurse letrare kombëtare dhe ndërkombëtare, ku është nderuar me çmime të rëndësishme, diploma merite dhe nderi. Theo Pezzi është vëzhgues i mprehtë i botës rreth tij; ai përshfaq një imagjinatë të mprehtë dhe aftësi për të trajtuar tematika nga më të larmishmet si dashuria, lufta, reflektime dhe komedi. Në vitin 2020, Theo Pezzi botoi një përmbledhje me 384 faqe me poezi dhe tregime me rimë me titullin: “Për shtatë ditë u krijua bota”. Përmbledhja është në dialekt si dhe në gjuhën italiane.
JETA NË AJËR TË PASTËR
Harmonia e ekzistencës
Nuk do të thotë vetëm
të shtrihesh në një lëndinë
dhe aromën e barit të shkelur
të thithësh paqësisht.
Nuk do të thotë vetëm
të ngjitesh në një mal,
të shikosh sa i bukur është qielli
dhe të shijosh freskinë që zgjuar të mban.
Jeta në ajër të pastër
janë edhe çastet e mbushura me gaz
që provohen kur mendimet
nuk janë më një barrë.
Është edhe ajo gjendje kënaqësie
në të cilën ne ndihemi
plot vitalitet dhe pasion
për të bërë gjëra të bukura plot.
KUR QAN ZEMRA
Kur të ze trishtimi
dhe gati të mbyt,
gëlltitesh me mundim.
Nuk është aspak e lehtë.
për t’u gëzuar, kur je i vetmuar.
Kur zemra qan
të gjitha mendimet shmangen
dhe shkojnë në një drejtim.
Melankolia, për fat të keq,
mbizotëron në shtëpi.
Në këto çaste të vështira,
duhet që të jeni
mirëkuptues,
sepse nëse zemra qan,
një arsye ajo e ka.
FAMILJA
Familja është forca më e madhe që ekziston.
Kur shqetësimet lindin në shpirt,
në fjalët e të gjithëve gjehet paksa ngushëllim.
Nëse dikush ka ndërmend të fillojë një biznes,
të gjithë për këtë, japin këshilla seriozisht.
Nëse bëhen gabime, ato paguhen shtrenjë.
Kur ka dhimbje sentimentale në mes,
zakonisht korrigjohen pa përmendur herezitë,
mjaftojnë ca përkëdhelje dhe një përqafim.
Nëse familja është e bashkuar, ajo është forcë
e pafund; si një luftanije, vështirë të fundoset.
Ajo di t’i japë ndihmë dhe dashuri edhe fëmijës më fatkeq.
PËRKTHEU NGA ITALISHTJA: IRMA KURTI
