Shaban Pllana - Tercina (trevargësha) me tematikë intime (-I-)
Moderator 
SYTË E MI
në kopshtin tënd të lulëzuar
dy qentë e mi të zi
ruajnë të shohin fluturimin tënd, flutur.
SYTЁ E TU
sytë e tu të kaltër
ishin kopsht ku lulëzoi dashuria ime e parë,
më pas, ata sy u bënë varr i saj.
FIJET E FLOKUT
me fijet e flokut tënd të artë
m`i qep plagët e shpirtit,
ke mbetur për gjithnjë në ëndrrat e mia.
FOTOGRAFIA JOTE
brenda një kornize të qelqtë
fotografia jote me një buzëqeshje të vjedhur
qëndron varur në mur në kohën e ndalur.
TI ERDHE
në ditët e asaj pranvere bleroshe,
ti befasisht u struke në ëndrrat e mia
dhe s`dole më kurrë që andej.
TI RRËZË MALI
ujëvarë malli në mua,
ti rrëzë mali
shtrirë në kujtime.
ujëvarë malli në mua,
ti rrëzë mali
shtrirë në kujtime.
QENIN E ZI TA VRAFSHA PUSHKË
nisëm largësive të blerta,
përtej moteve qeni i zi i këput zinxhirët,
qenin e zi ta vrafsha pushkë.
NË DËRRASË TË VEKUT
e! sa loti i syzezave u gurëzua n`dërrasë të vekut,
e trimat s`mund t`i zinte as plumbi
që ua drejtonte kanuni.
M’I KE PRERË ËNDRRAT
m’i ke prerë ëndrrat me gërshërë,
si s’të erdhi keq,
që ma këpute ylberin e shpresave.
