LUIS CRUZ-VILLALOBOS (Shqipëroi IRMA KURTI)
Moderator 
LUIS CRUZ-VILLALOBOS
LUIS CRUZ-VILLALOBOS, (Santiago de Chile, 1976), është poet, shkrimtar, redaktor dhe psikolog, me një prodhim të gjerë letrar në poezi dhe ese akademike, me më shumë se pesëdhjetë libra të botuar. Ai është psikolog dhe specialist në psikologjinë klinike, fushë në të cilën ka punuar për më shumë se njëzet vjet.
TË NDIEJ NË ERË
Ndonjëherë ti vishesh si era
Qoftë ajo e butë apo e stuhishme
Ti mbulohesh me ajrin e hollë
Ti që nuk ke nevojë as të vishesh
Ti vallëzon dhe veten e humbet
Duke u dhuruar si puthje a përqafim
Unë bie në shtratin tënd
Që nuk ka as kufij, as trashësi
Lotët e mi janë prej drite atje
Mendimi im si xixëllonjë shkrep
Dhe zemra ime transformohet
Në strehën tënde një herë e përgjithmonë.
LUMI I PËRJETSHËM
Lumi më tregon për Ty
Lumi i Madh i Përjetshëm
Prekja e tij miqësore në shkëmbinj
E shndërron në rërë teksa rrjedh
Ndërsa jeta ime përparon me ty
E përhershme dhe e dhembshur
Ajo zvogëlohet gjithnjë e më shumë
Derisa një ditë të zhduket
Dhe ti së fundi je gjithçka
Lumë i pafund që rrjedh
Në mitrën oqeanike
Që ti je dhe gjithmonë do të jesh.
Përktheu dhe redaktoi IRMA KURTI
Poete, shkrimtare dhe gazetare
Itali
